(ڳالھائڻ جا لفظ) (Parts of Speech)

 

 
(سبق ٻيون)

(ڳالھائڻ جا لفظ)( (Parts of Speech

 

1. اسم (Noun)

2.ضمير (Pronoun)

3. صفت (Adjective)

4. فعل (Verb)

5. ظرف (Adverb)

6. حرف جر  (Preposition)

7. حرف جملو  (Conjunction)

8. حرف ندا (Interjection)

 

1. اسم (Noun)

 

اسم عربي ٻوليءَ جو لفظ آهي جنهن جي معنى آهي “نالو”. ڪنهن ماڻهوءَ، شيءِ، جاءِ، ڪم، حالت ۽ خاصيت جي نالي کي اسم چئبو آهي.

مثال:

اڪبر، ڪرسي، اسڪول، لکت، اميري، هوشياري وغيره

 

2. ضمير (Pronoun)

ضمير معنى “عيوضي”. اهڙا لفظ جيڪي اسم جي بدران ڪم اچن تن کي ضمير چئبو آهي.

مثال:

مان، تون، توهان، اوهان، هِن، هُن، اسان، اسين وغيره.

3. صفت (Adjective)

        صفت معنى ساراهه. اهڙا لفظ جيڪي اسم جو گڻ ، او گُڻ، انداز، مقدار يا رنگ ٻڌائن تن کي صفت چئبو آهي.

مثال:

سٺو، هوشيار، جڏو، چالاڪ، ننڍو، وڏو، اٺ، نُوُ، ڪجھ، گھٽ، وڌ، ٿورو، گھڻو وغيره.

 

 

 

4. فعل (Verb)

فعل معنى “ڪم”. اهڙا لفظ جيڪي اسم جو، ضمير جو ڪم يا عمل ظاهر ڪن ته ان کي فعل چئبو آهي.

مثال:

آيو، ويو، لکيو، پڙهيو، ڪيو، ماريو وغيره.

 

5. ظرف (Adverb)

ظرف معنى ”ٿانءُ“. اهڙا لفظ جيڪي اسم جي صفت، فعل يا ٻئي ظرف سان شامل ٿي ان جي ريت قدر، انداز، هاڪار ۽ ناڪار ۽ وقت ظاهر ڪن تن کي ظرف چئبو آهي.

مثال:

آهستي، ڪالهه، جيڏانهن، تيڏانهن، اڄ، سڀاڻي،تيز، هائو، نه هيٺ، مٿي وغيره.

 

6. حرف جر  (Preposition)

حرف جر معنى “ڪشش يا ڇڪ”. اهڙا لفظ جيڪي جملي ۾ اسم يا ضمير جي پٺيان ڪم اچن. ان جو تعلق جملي جي پوئين اسم يا ضمير سان ڏيکاريندا آهن.

مثال: جو، جا، جون، سان، جي، کي، ۾ وغيره.

 

7. حرف جملو  (Conjunction)

اهڙا لفظ جيڪي ٻن لفظن، ٻن جملن يا جملي جي ٻن حصن کي پاڻ ۾ ملائن ته انهن کي حرف جملو چئبو آهي

مثال: مگر، ته، اگر، پر، به، پڻ، يا، اگر وغيره.

 

8. حرف ندا (Interjection)

ندا جي معنى “سڏ يا دانهن”. اهڙا لفظ جن مان ڏک، خوشي، دل جا اڌما، حيرت،عجب،ڌڪاء، احساسات ۽ جذبات جو اظهار ڪري سگھجي ته ان کي حرف ندا چئبو آهي.

مثال:

او، ڙي، افسوس، واهه واهه، گھوڙا ڙي، ڪاش، جيڪر وغيره